يالله يا منجي خليلك من النار
يا مفرجٍ كرباتنا والبلايا
نلهج بذكرك فالدياجي والأسحار
نطلبك غفران الزلل والخطايا
وأنك توفقنا على درب لخيار
وتحسن لنا مقصودنا والنوايا
من بعد هذا ابتدي عد الأشعار
للدار لي تسكن بوسط الحنايا
ماجورهٍ يا دار من كل الأضرار
ومحروسةٍ من كل شر ودهايا
صابج وزى يا دار من فعل غدار
حاقد ويسعى دايمٍ للرزايا
ما ردته اعراف دين وحسن جار
يسعى بخبثٍ فالعلن والخفايا
يبسم لنا واثره عدو ومكار
يدفن لنا سم الحنش والحيايا
ما يدري ان المكر راعيه ينهار
ويحيق به فعله وذيك السوايا
ومن حط دين الله للخدعه شعار
دارت عليه الدايره والرحايا
ونحنا بفضل الله في ظل الاحرار
ياللي لهم طيب الذكر والنبايا
تحت قياده حاكم عادل بار
بو خالد اللي قاد صف السرايا
من دون شعبه درع وحياب وستار
شايل همومه فالمحن والرخايا
يواصل المجهود في ليل ونهار
على جميع الاصعده والقضايا
واذا وصلت له نار في قرب لحضار
نال العدو منه عويل وبكايا
ساقه الاهي رحمه لكل الأقطار
مده كريم من جزال العطايا
وعلى يمينه سيف ماضي وبتار
وزير قواته حميد السجايا
صان لحقوق وحافظ كل لذمار
وله موقف مشهود بين البرايا
ياقاه ربي من صواديف وعثار
وله يدعون كهولها والصبايا
ويا شعب كونوا كلكم صف وجدار
لا تتبعون مروجين الدعايا
ورا قيادتكم معاوين وانصار
والشعب واعي ما يباله وصايا
ما غير تنبيه ومالقلب تذكار
ذكرى لنفسي مع جميع زملايا
الله يديم الامن ويزيل الاكدار
ونعيش في فرحه وانس وهنايا
ويشفي مريض يشتكي جرح وعوار
مما تسبب من سقوط الشضايا
ويقبل جنود مرخصينن بالاعمار
لجل الوطن خاضوا دروب المنايا
تمت وصلى الله على سيد لبرار
وللمستمع مني سلام وتحايا