يقول الذي دقّه على القول هاجس
تماثيل شعرٍ ضايلات حشودها
تفرح بْها الحسّاد ليمن تعظّمت
ولا تهوّن أمرها إلاّ فهودها
تلقى علوم السوّ فيها تسادي
ولا ينعرف مْحبّها من حسودها
وردّيت من هذي المثايل لغيرها
ولا شوف منشابٍ عليّه يكودها
يا بو محمد يا عضيدي وْمسندي
وإن اشتكلت حالتي يا وجودها
اللّه يخلّيكم ونحنا كذلك
ولأحرار ما تشهرْ بْليّا عضودها
نزاحم بك العدوان وإن زاحمونا
وياللْه ترجع سمّها في كبودها
وأنا أوصيك يا فتّى منّي وصيّة
النفس هنْها لا تعدّى حدودها
حاذر على نفسك من الزّيف والزّلل
وطالع مخاصيص الجدى من عدودها
النفس وإن طاوعتها ما تردّها
مثل العزوم اللّي قويُّ سنودها
والكلمة العوجا فلا لك بنقلها
ومغالب الاشيا كما النقص زودها
واذا وليت السدْ لا تكون موضح
وأقلع على الشقرا بقايا جرودها
والمرجلة فيها دروبٍ صعيبة
خصايلٍ تشهد عليها شهودها
يشهد عليها الدين والطيب والكرم
ومحاذير نفسٍ عن بقايا نقودها
ويشهد عليها الزرق ما بين غلمة
يوم الدنايا ينقص الزّرق عودها
ولو ما عرفناها عسانا نعرفها
وعسى أن نقبض من بقايا شهودها
فلا خير في دارٍ بلا الغيث والحيا
كما قريْةٍ تخبث بطاين جنودها
لين في الوديان ويزيد جريْها
وعْمان تتسمّى على من جمودها
وطلبت من لا فيه عيبٍ كريمٍ
اللّي رفع سبعٍ بليّا عمودها
وقامت يزاغيها اليماني وتنتحي
وبرحت قوانفها تقصّف رعودها
تولّفت على القلب من كل طارف
لواهيب حرٍ ما يحصّل برودها
عسى اللْه يسقى دارنا ثايب الحيا
بمْخايلٍ ربّي الكريم يجودها
مزنٍ تهاميٍّ وحقبٍ ترضّفت
مزابير سحّابٍ غلاظٍ رفودها
يا الله تمنّ بْها علينا وعسى
تهلّ ماها من كرمها وجودها
تسقي من الظّفرة الى ساحل الختم
وْعلى أبوظبي ودبي ربّي يقودها
وتاخذ ديار الغافريّة مْشرّق
هذا ولا الربّ الكريمْ يهودها
ولو ما وليناها عسانا نشوفها
وعسى ان نولى سْديّدٍ من سدودها
وتسقي بنادرها وتروي برورها
والبدو تصبح تشرب الغدر ذودها
إذا لفحّها لافح الكوس واقبلت
جاتك كما خودا تهادى بهودها
واذا ضربها العقربي قام يلتوي
شرى ليّ الرشيِّ اللّي صديرٍ ورودها
وان لضّ فيها بارق العود واسفرت
اتبسمت عن ما علا من ندودها
ويلنّ منها شارعٍ فوق شامخه
هواويّةٍ طار الغشا عن خدودها
ويا واحلى في الارض دقّات وطيها
يغبّر بها القاع من بار جودها
تصبح مغاني الأرض منها تضاحك
تنادي رواويد الحيا لي ترودها
ويا واوحلاها لين ذابت وأدبرت
واصبح بها قوس القدح في ركودها
تْقصّ بْها الخلفات تهبّ وْتسند
وما تنعرف مضموتها من رغودها
تمّت وصلى الله على خير هادي
ما لعلع القمرى وما هبْ نودها