يا رب وابل خير وان ما حصل طل

يا رب وابل خير وان ما حصل طل

يحيي هشيم الحظ من بعد الإنكاف

تعود فيه الروح والحلق يبتل

ويرجع جميع اللي فقدناه أضعاف

أحيان أحس إني مميز عن الكل

إنسان واضح اجتماعي وشفاف

وأحيان أحس إني مشتت ومختل

واللي على راسي عساكر وسياف

وأحيان أحس إني جسد يتبعه ظل

لكن ضله لا مشى ما له أطراف

يا رب جتني ناس تشكي من القل

وأنا لها لو كان بالبير غراف

لكنك اعلم بي وأنا ماني بكل

مستور حال ولا على حالي خلاف

ناس على كثر العوز ترفض الذل

ما تطلب المدة ولا تسأل الحاف

وأنا مشتت بينهم ما معي حل

والحمل ما تقوى تحمله الأكتاف

لو قدموا عزايم مزاين البل

ما توقف الحرة على باب صراف