البندق اللي يا خلف تخطي الصيد
ما شالها راع البخت في مضيفه
ما طبت إلا في يدين المقاريد
اطنخهم الخبل السفيه الهديفه
وأنا يبو خالد توغلت بالبيد
ودخلت في ضلع الرمال المخيفة
نزلت بالصحراء بليا مواريد
متحديا ظلم السنين الكفيفة
نطحت بيديني رصاص البواريد
ما هي شجاعة داخل القلب خيفه
واجهت لي سبع وتعديت عربيد
في موقف ينسى المحالف حليفه
يشيب راس اللي يغاغي على الديد
بين اللغم والطايرة والقذيفة
شلفا ذياب ولو ماها على حيد
قضت على اللي تحتها بالنصيفة
وإذا تذكرت الرجال الصناديد
مثل ابن غانم والزناتي خليفه
راح الصيام ولا لفت فرحة العيد
ودمع اليتيم ابتل منها رغيفه
والفاطر اللي روحت مالها قيد
مدلله راحت تهف السفيفة
ياصعبها على المهلل وأبو زيد
وياسهلها على الهنوف العفيفة
وأنا أحمد الله ما فعلت المناقيد
ولا لبست إلا الثياب النظيفة