يا مرحبا يا خوي الحرف والسلسبيل
مراكب الشعر تمشي ب امر ربانها
يا صاحبي ما بقى بالكون ظلٍ ظليل
ألوذ به لابدت بقعا ونيبانها
وقفت قول الشعر ما شفت فيه الحصيل
ما غير يفتح جروحٍ تبكي أحزانها
من غادرت عن عيوني ما طلبت البديل
اللي تكفّي عن الدنيا وسكانها
بكيتها دم وابكتني دموع الرحيل
وأنا أشوف الدموع تسطر أحزانها
لا تفتش الجرح وتنبّش بنعش القتيل
معارك الحب ما تاوي لفرسانها
والمهرة اللي خذت قلب الحصان الأصيل
عيونها السود ترقب طلعت حصانها
واللي خذت قلبك العاشق وعوّد عليل
خذ قلبها النابض وردّه لوجدانها
اصبر وأنا أخوك والملتاع ليله طويل
لو بعت عمرك مهو واجد على شانها