إليكم هالقصيده ياجماهيري وهي خطره
وخلوا ؟ هالرقابه تسجن الشاعر وجمهوره
هدوءًا أيوّ هالساده حضور الحفل والسهره
مساء الخير عالصاحي وأشوف الناس مخموره
أنا آسف على الأزعاج ولكن طارت السكره
ذكرت أني قبل ساعات ؟ أصيل وعزوتي نوره
على فكره ( الكرفته ) عجزت أفكّها عسره
أبي واحد ينزلها أو أيّ وحده ومشكوره
وأبي ثوبي جيبوا لي ثوبي الأشهب مع الغتره
قبل والله لطربقها على هالحفل بحضوره
ولا واحد يتكلم قبل ما أخلص النشره
ومن يحكي قسم بالله لدوس برجلي حنجوره
تراها قفلت ياسادة أبلادي وياستره
وهي مدامها خربت بقول الليله الثوره
أنا بحكي من أول يوم جيت لدنية ٍ قذره
وتكرم عن قذارتها بيوت الله ومعموره
أنا مولود في ليلة شتا مع بردها مطره
في خيمه وسط صحرا مابها سستر ودكتوره
أنا ياحضرة الساده غريب وضاع من صغره
لعن جدي زماني بين ؟ مدهوره ومهجوره
حملت من الشقا مالا يطاق وجايكم ذكره
ولاني عاجز أتحمل وأموت بنفس مقهوره
وأنا أدري يذبح الرجال كثر الصبر في قهره
وعن قهر الرجال المصطفى حذرّ ومذكوره
وهم قالوا مفاتيح الفرج للحيّ في صبره
وأنا أشوف الصبر مفتاح ضاع وزاد طابوره
تعبت الملم أيامي بيدين الهم والحسره
تعبت ألمع البرواز وأمسح غبرت الصوره
تعبت أبوس كف الجوع وخشم الفقر طال عمره
تعبت أكذب على الحاجه وأقول الحال ميسوره
تعبت أحمس من القهوه وأحط السمن والتمره
تعبت ودلتي وحده وكل شوي منثوره
أحسب العز بالدله وبيت النذل به عشره
دلاله أكثر الملعون ومليانه ومسطوره
أنا بحكم البداوه أنزرع في داخلي بذره
عن أعلوم المراجل الف بذره فيني مبذوره
تربينا على الدين ونطيع الله مع شكره
وتعلمنا نصلي ونحفظ القرآن وكل سوره
تعلمنا نحب الضيف وفينا الكرم فطره
تعلمنا نقول الصدق لالفه ولادوره
تعلمنا نحلب النوق ونعرف وشهي البكره
تعلمنا الضما وحنا بيدينا البير محفوره
تعلمنا وكثير اللي تعلمناه وش كثره
أخذنا درس بالدنيا بلا دفتر وسبوره
وأنتم ياسكارا الحفل عفوًا أيوّ هالزمره
منو فيكم عرف قهر الزمان وظلمه وجوره
منو فيكم وطاه الجوع وذله وصفقه فقره
منو فيكم عرف يحتاج للقمه ونشف زوره
منو فيكم من الضيقه حفر بأصابعه قبره
منو فيكم رقد ليله وسط أجساد مقبوره
منو فيكم مشى حافي برمضًا كنها الجمره
منو فيكم سهر ليل الظلام بدون أباجوره
لكم ( الماء ) ( والوجه الحسن ) ( والمال ) (والخضره )
ولنا حنا ( الضما ) ( والجوع ) ( وفقر ) ( وشيفة ٍ عوره ) ؟
ولامره ضحك حظي بوجهي وأشكره مره
وغيري يبتسم حظه وكل أيامه مسروره
كتبت الشعر من صغري وبيوتي مابها كسره
وأنتم تبرزون اللي كتب بيتين مكسوره
أنا ياحضرة الساده فقير ٍ ما أغتنى ّ بشعره
مدام ( المومس ) اللي تشري الأشعار مشهوره
وأنا ياحضرة الساده هنا الليله وعلى فكره
ترى ( هالبدله ) مسروقه ورجلي بجزمه محشوره
ولكن قلت أبحظر هالحفل والعمر أبختصره
وأبي أبدع معاكم وسط ليلة أنس ومحظوره
وأذا كانت رجولتكم بكأس الثلج والخمره
أنا بشرب بدون الكاس وثلجه ألف قاروره
أبويه قال لي مرّه دسم شاربك بالغبره
مايدري بالشنب محلوق وجابر فاقد أشعوره
أنا بمشي مدام الليل ودّع وأبتدى فجره
بروح أرد ( هالبدله ) على المعلاق مزروره
وأنا أدري ياكلاب الحفل أني ( بالسجن ) بكره
مدام الليله جبت العيد بهذا الحفل وحضوره