هو الليل هذا ينتهي قبل ما نبداه

هو الليل هذا ينتهي قبل ما نبداه؟!

أو انه أنا اللي ما عرفت ابتدي من وين!

احب السهر، ويحبني النوم لو اسلاه

يا رب الليالي كلها، الليل هذا لمين؟!

لمرتاح نام الليل من أوله لاتلاه

ولا شال هم اللي من همومهم صاحين

لمن هو عليل، وما عرف علته ودواه

تجدد به الونات، واللي معه غافين

لمن ينتظر غايب عنه ما قدر ينساه

يعيش بأمل، لو مر من هالغياب سنين

لمن عاث به فقره ومن عاث فيه غناه

احد مل من متعة، واحد مل كثر الدين

لشاعر يقول اجمل كلام البشر واحلاه

تسوسن بعينه ليلته لو كتب بيتين

أو انه لعاشق يرسم الحلم في مسراه

وبنت من الفرحة نثر ليلها مشطين

أو انه لعابد باع دنياه في مصلاه

من الزهد، والدعوات تصعد بها: آمين

لمتأمل الليل، انتهى ما عرف معناه

او انه بدا من وين، أو انتهى لا وين؟!