يسرني و يهنيني
أدفع ضرايب على عيني
أدفع ألوفي و ملاييني
لكن تعالوا حاسبوني
أكون سعيد و أكون شافع
لو تتصرف على شيء نافع
مثلاً مصانع و مدافع
و لا على القصر العيني
و اقطع لكم لحم كتافي
و أبيع هدومي و لحافي
و لااشوفش جايع و لا حافي
يغمني و يبكيني
و بادعي أيام و ليالي
أشوف كده السد العالي
و أقول دا مبني من مالي
و كد إيدي و جبيني
و يا سلام لما تجيلنا
النفاثات مع أساطيلنا
يومها صحيح نبقى وصلنا
و اقول يا عالم هنوني
و ابات مضمضم متكدر
لما الضريبة تتبحتر
مهيه للأستاذ بعجر
و عبده شخرم بسيوني
اللي ابنه بعته ف أوروبا
و من فلوسي بيتربى
قريب يعود زي الضربه
و يقول مع والدي خدوني
جثه على المكتب قاعده
أو في القهاوي متواعده
ماهيش سياسة و لا عداله
الأمة نصها شغاله
و نصها التاني عاله
يتبط و يقول رقوني