أنا لي رفيق دق صدره وتالي حاص
يا شين الوعود اللى تجي عقبها الحوصة
لاصرنا على شاهي ودله وتمر خلاص
يجيب المراجل شق حلقه تقل بوصة
ولكن لا جاء بالعلم علم وكلامن خاص
تجي وقفته بين الرجاجيل منقوصة
يجيد التنصل زين ويدور المخلاص
وهو بالرخا حكيه مثل شجرة الخوصة
رجال ما يحمي كلمته نعتبره هلاص
ولو هو من رجال بالأمجاد مخصوصة
خدعنا لميع البدي واثر البلا بالشاص
ولا فادنا قولة جديده ومفحوصة
ترى المشكلة ما هو بدين بلا مخلاص
لكن البلا في دقة الصدر والحوصة
هلا مرحبا يا شاعرن بالقوافي غاص
وجاب القصيد بفن وأبيات مرصوصة
ويشكي من اللى حين جات اللوازم لاص
ويا مكثر أبطال السواليف واللوصة
وأنا مثلك أعاني من اللى كما الوصواص
ولحاهم عن أفعال المواجيب مقصوصة
رجال بوقت الضحك تلقى لها مجعاص
بكثر الحكي فوق المسانيد مجعوصة
تفتل شواربهم على الصيد والمقناص
وهم والحباري للقرانيس مقنوصة
سواليفهم مرّه كما الحنظلة وعباص
ولابه سوالف عندهم غير معبوصة
دجاج تناقر بعضها داخل الأقفاص
صيود الحصاني لو ما هي بمقفوصة