أنا ما بعت قلبي للخطا والخوف والحرمان
ولا فكرت اهمش دمعتي واسخر من اشواقي
نحرت السالفة واللي يصير العن من الكتمان
وسلمتك رماحك والسموحة لو بقى باقي
كتبت ولا كتبت الا عشان تقدّر العنوان
ولاني فصل من ضمن الفصول تساقط اوراقي
حروفي شامخة ما تنحني للدمع والعصيان
ولو طارت عصافير الوله من سدرة احداقي
سقط من حايط الرغبة جناح ملهي الرعيان
بعد ما كان في لوح الشعور بريشة اذواقي
انا سامحت وش باقي خساير بعد هالخسران
تلاقي من يشوفك بالندم وتشوف وتلاقي
صحيح ان العطا للمسرفين يبرر النكران
ولكني كسرت الكاس الاحمر في يد الساقي
مسامح والمواني مشرعة للدمح والهجران
وشامك شامك اللي ترغبه وعراقي عراقي
مسامح وان لفيت من الدرايش دونك البيبان
تجي وتروح لكن لا تفكر تفتح اوراقي
تذكر كل ماطار الوله من شرفة النسيان
وخذ برد السؤال وفكني من ربكة اعماقي
عسى الرحمن يلهمني بعدْك الصبر والسلوان
ويحسن بك عزاي ولا يعرض للندم ساقي