ازيك ياما وكيف حالك
أخبار التراب والوحدة
يا سايباني لوحدي قليل
يا عارفه حزني يا شاهدة
علي كبري بخبيني
جوا نفسك الطاهرة
وبرجعلك ف أحزاني
بتشفيني من القهرة
وتمحي قسوة الأيام
تهديني وتحكيلي
كأني هنام
تقوليلي ولا يهمك
مسير الضيقة هتعدي
ما ياما كتير علي يدي
كتير أوجاع بتتصالح
وربك سايق الصالح
كنت اجي الاقيكي
علي سريرك معاكي الله
تغيبي جوه فرض صلاة
تناجي المولي تترحيه
وأسمع دعوتك ليا
يا رب تسعده وترضيه
وجيت مره عليكي ببص
لقيتك ياما تعبانه
ولا مره شكيتي لحد
بس تعبك النوبة أكنه بجد
دخلت عليكي ف الأوضة
سلامتك ياما وبعوده
قلتيلي خلاص يا بني
قلتلك أكون قبلك
يا رب طول العمر
اللي بيديني أمل ف الغد
وخدتك ياما ع المشفي
وكلمت الدكاتره أيه
قالولي خير
وأمي بيا مشغولة
وبصالي وبصة غير
قلت أهزر معاها يمكن
أعرف منها أيه هيصير
قلت أشغلها بالماضي
وأفكرها بلمتنا
ولما اجي من بره
كنت بلهفة أحدتها
تقولي جيت يا حبيبي
أقولها تحت رجليكي
تقولي ربنا يخليك
أقول ربي يخليكي
يا شاغله دنيتك بيا
وشاغل دنيتي بيكي
أمي مالها يا دكاترة
قالولي خير
خدوها خلاص علي بيتها
خلاص خفت
نظرت بعيني ناحيتها
لقيتها غير
قالتلي يابني وديني علي أمي
قلتلها دا لسه كتير
قالتلي خلاص هسلم نفسي
للمولي قعدت كتير
سرحت ف صفحة الماضي
وطشت ف عالم الملكوت
لمحت ضجه حواليا
لمحت سكوت
ونا قاعد كئيب محزون
فجأه لمحت صوت تليفون
مين بيتكلم
يا رب ما تكون ملك الموت
فتحت لقيته ملك الموت