ف مصر الجميلة
وناسها اللطاف
ما نعدمش حيله لجل ان نخاف
فنام م المغارب وشد اللحاف
ف مصر الجميله فى ناس ميتين
لا تقول تعبنا ولا محتاحين
والدنيا ماشيا والعيشه آشيا
وما دام إنت راضى أكيد مرتاحين
ولو بعت مصر ف يوم للأعادى
ما هبدى امتعاضى ولا اقول لمين
إحبس وإسجن واقتل وأشنق
وهجر يا سيدى هقولك آمين
مش انت اللى عارف وانت اللى شايف
مصر دى ورثك يا نعم الأمبن
بضلة سماها وشعاع ضياها
إفضل وراها وإشهر فلسها
مصر الجميله ملكك بناسها
وطول مانت قاعد فيها مآنسها
بسمك ربى صاينها وحارسها
ف مصر الجميله سجون واعتقال
وتهجيرها قسرى وتعذيبها عال
دى مصر الجميله لناسها الجمال
وكيف تبقى لينا وشاويشها ما زال
بيقطع رقابنا وبيقول نضال
مصر الجميله يا زينة شبابها
ربك عشاننا رئيسك وهبها
نسبح جنابو ونعبد ترابها
كأنو خلقها ومن صلبو جابها
نقدس ف نيلها مهمن يصيبها
والظلم دايم وصاحبك ركبها
وكل البهايم جاثية لركبها
وفتنة عظيمه إحنا سببها
سلمنا مصر للى نهبها
وفض بكارتها قدام شعوبها
وإعلام عواهر قلعها توبها
وسلمها للى ياناس إغتصبها