عوافي يا بلد
البلد السمح تيرابها
مالها تقاسي اييييه أسبابها
تبكي وحيدة والكل سابها
مين زعلها وبكاها
مين ووقد نارها ولع في ديارها حرابة
مين عايز ودارها خرابها
وين الناس البريدوها وبحبوا ترابها
وين جنياتها وين أحبابها
وين كُبارها وين شيبتها وحتى شبابها
يواسوها ويكفكفوا دمعتها الصابة
يسندوها ويوقفوا شلال الدماء الكابة
سألتك يا كريم
تطيب خاطرها وترتالها
تحفظها يا كريم وتصلح حالها
تمسح دمعتها البتنزل حارة
تأمنها من صوت السلاح والغارة
تهديء روعتها من الخوف السكن بجوارها
ترأف بي شيوخها نساءها وبرضو صغارها
وبي لطفك يا لطيف
تنجاها من حالاً مخيف
حال الشتات وحال الودار الما عنده قيف
لا تحصل خراب ؛ لا تيبس وينساها الخريف
يا رب العباد
نسألك النجاة
لكل العباد
الهنا والبُعاد
وتصون الوطن
من كيد العدا
وتزيل المحن
وتصلح حالنا دا
تحقن لي دماءنا
وتحفظ للحياة
يا سودانيين
يا مُسالمين
خلونا ندعي ربنا
بي يقين
شان يرفع البلوى
ويعين
ويحفظ البلد الأمين
الحبو فينا فرض عين
والحقو علينا أقوي دين
من أن يضيع ويصبح أثراً بعد عين
أو يروح سُدى ويأكله المرفعين
يا الله عِين
يا الله عِين
ونجينا من هذا الوضع اللعين
وأحفظ بلدنا من شرور
الحاسدين
الحاقدين
المتربصين
الهمهم يشوفنا نحن
على الدوام
متنازعين
ومتشاكسين
ومفرقين
لا لامين شمال ؛ لا لامين يمين
نسكت نكاتل في بعض
وعلى الخلاف متوحدين
بس يا جماعة سألتكم
زي حالنا دا بيرضي مين ؟؟
يا شعبنا
ويا أهلنا
يا أولي الألباب والنهى
أخير الناس تحكم عقلها
ننسى الخلافات ونصدها
نتوحد جميع وفرقة بلدنا نسدها
نأتلف لا نختلف ونوسع قدها
عشان خاطر بلدنا الطيبة
ترجع زاهية وطيبة
ننشلها من غياهب المجهول ؛ ومن فك الضياع نرُدها
نبنيها من تاني
وتخضرا من تاني
وترجع زي زمان
جنة
للبعيد والداني
لا يرطن سلاح فيها
لا يحزن ضعيف فيها
لا عيون صغارها تعاني
تعود
واحة للسلام والإلفة
لهجات شتى وسحن مختلفة
إلا السرائر بيضاء
والقلوب مؤتلفة
والسلام تاني يعمها
في شمالها وشرقها
وفي جنوبها وغربها
الأحزان تغادر دربها
والربيع يسكن جنبها
بلدنا الزينة
يرعاها ويحرسها ربها
وبي عينو يوم ما يغبها
يخليها لينا ويرزقنا صادق حُبها
تبقي عافي
يا بلد التصافي
جاري نيلك
وخيرنا وافي
تعقر الحرب اللعينة
والهموم تبعد تجافي
ترجع البسمة الحنينة
ويرحل الوجع الخرافي
وتشرق شمسك يا بلد
تااااااااااني
والقماري تفارق المنافي