أنتم بدو وإلا من الريف بادين
يهل الحلال اللي لفيتوا عربنا
يا ليتكم جيران عمر وزمانين
وليت المفارق ما يشتت شعبنا
وايروح عمري في هوا كامل الزين
اللي هواها بالخوافي عطبنا
ابو ثنايا لمعهن يشعق العين
لمع المزون وفي بروقه جذبنا
غرون حلاته غير كل المزايين
سدّد على نبض الخفوق وضربنا
طفلن رماني يا عرب بالحجاجين
بالعون لو يغزي برمشه نهبنا
اللي لعب بي مثل لعب الظعافين
ولو تاب راع الذنب ما عنه تبنا
غالبت حبه بالقسى نوب واللين
لكن تمكّن بالفؤاد وغلبنا
يامر وينهى مثل أمر السلاطين
يومن تسلطن في هواه وغصبنا
يهل الحلال اللي لفيتم مغبين
ارعوا خفوقي كان تشكو جدبنا
وياهل البيوت اللي تشدوا على وين
الله حسبكم كان بعتوا طنبنا