أنشودة العيد عندي شوفة عيونك
لعلّي اطرب بها روحي واسليها
أنشودة العيد أشوفك وانت بفنونك
تشبه لنجمه جميله في مساريها
لا واهني الذي حولك يشوفونك
في كل صبح ومساء وخطاك قاريها
لا واهني من نظر ساعه في جفونك
لو كان بأغلى ثمن كسبان شاريها
ما شفت بين الخلايق من يضاهونك
فيك الحلا والطبايع من يجاريها
يا ليتني شعرةٍ تنزل على متونك
لا جيت بالمسك والعنبر تداريها
لا يا حياة الكثيري خفف طعونك
من عام الأول وفي قلبي مواريها
لا تحسب أني أعيش اليوم من دونك
الروح بعدك ترى كثرت طواريها
افز واقف الى من جو ينادونك
اذكرك يا ديرة عشنا بحواريها