من نجد دار آل السعود المناعير
أرسل على دار الشمال التحيّه
الضيق في صدري يفكّ الأزارير
والفكر يشعب للشمال المطيّه
هذي ظروف أيّامنا والمقادير
الحيّ يرجي يا ملا شوف حيّه
وإن خانت حروفي جميع التعابير
والدمع راق من العيون الشقيّه
ما قلت وين الصاملين المداوير
ما دام لي شلفى ولي بندقيّه
الشعر بيدا ما تعرف المعاذير
ما يلتفت فيها الخوي لخويّه
كلٍّ يلمّ حشود الأفكار ويغير
يبغى السمان ولا طمع بالرديّه
وإن قالها الله ما تطول المشاوير
ومن قبل حتى فوحة الشاذليّه
ألفي بشيٍّ فيه غيض الصقاقير
وكلٍّ على نفسه يسوق الزريّه
وإن كانت دموع الليالي محادير
يردّها طبع العزوم القويّه