يا عيني اللي زاد فيها سهرها
السهر عن لذة كراها صدفها
إن طولت بالسهر تفقد نظرها
وشحيلتي يا عارفينٍ هدفها
ما دام دمعاته بشاني نثرها
يومه فهم قسوة ظروفي ذرفها
حان السفر والروح عود خطرها
قامت تهددها الهموم وسلفها
وسمعت آخر كلمةٍ له قصرها
قالت تعود وزاد حالي كلفها
رد الخفوق بونتا له جهرها
من ونته قفت وروحي خطفها
ناشدت روحي بالخفا من جبرها
قالت ظروفك يوم حضك نسفها
أبي أتصبر لوتراكم قهرها
ما ترجع أياما زماني حذفها
انسي مع الأيام واحرق صورها
واغضب على منهو ذكرها وصفها
هذا جداية يوم حضي خسرها
جاب التعاسة والوناسة صرفها
واربع حروفا في ضميري قبرها
كانت تشع بنورها لمن عرفها
يا ليت معنا الاسم حاصل دهرها
أو الظروف القاسية لي عسفها