خربشة كلام الى سرب الحمام
ياسرب الحمام يامبعتر
اتجمَّع ليلعبوا بيك
دا نسور السما بتتنمر
وعيون الحدادي عليك
والشارده ياسرب ياويلها
الأصلع ده عينه منها
والأصلع ده نسر لعين
يتمنى لوحده ينولها
ويقصقص في ريشها شوية
وتكون له ضحية هنيه
لاتقاوم ولا تقول لأه
وساعتها تكون منسية
وتهمهم ياسرب حمام
وتنوَّح كما الأيتام
والأصلع يبص ويضحك
من خيبتك يابو الأوهام
يانايم قوم اصحى وفوق
شوف دايرك صبح محروق
والأصلع ده جهز نفسه
للتانية بلهفة وشوق
والتانية ياعيني عليها
حيلف الحبال حواليها
واهي لما ماتلقاش مهرب
حتسلم وفين تلاقيها
ويقولوا كده ف تصاريح
ليه طارت بعكس الريح
وياريتك ياسرب تصحصح
صدقني كلامي صحيح
واتحرر من العبودية
وعيونك على الحرية
واتجمع ياسرب حبيب
اتجمع ياغالي عليه
ونسور السما راح تبعد
وتخاف لما تيجي عليك
ياسرب الحمام اتوحد
وساعتها مايلعبوا بيك
وانتهت خربشة الكلام الى سرب من الحمام