ثلاث أهداف يا نوره
هزيمة (حب) أو (كوره)
دَلَقْته فوق تنوره
ورى حرفين مكسورة
تعالي نبتدي (اللعبة) من الأول
من الماضي
دخيلك يالله نتحوّل
من أول حكينا الفاضي!
هنا ندخل في (اللعبة)
هنا من أبسط الأشيا إلى الصعبة
ونستغرب:
أحد يولد فقير وفيه احد أغنى
أحد مو لاقي يتعشّا
واحد يحصل على مليون من مغنا
وياخذنا الحكي الفاضي
من النصّاب
من الفرّاش إلى السوّاق إلى المسئول
من اكبر موظف ينهب الدولة
إلى أصغر موظّف ملّ يفطر (فول)!
دخيل ايديك يا نوره
أنا شاعر عجز لا يشغل الجمهور بأهدافه
ولكنّه رفض رشوة لغه، تطلب شعر تافه!
قالت: أبخسر عشان تفوز
قلت: العبي لو سمحتي زين
قالت: أبهزمك، قلت: يجوز
لو انهزمت انتصر بعدين
الحظ يحتاج فك رموز
ويحتاج (لغز القدر) شوطين!
قالت العب من جديد
قلت: كم ظالم تدك الأرض رجلينه بحريّه
وكم مظلوم رجلينه يطوقها الحديد
قالت: العب
قلت: لكن، بعد احرر من سجون الشاشة آلاف العبيد!
ما عرفت النصر يا نوره سوى في (حصّة التاريخ) لمّا كانت الغزوة تقررها عصا أستاذ
متحمسّ ل (ربط) الخيل في ذهني، ولكن، للأسف ما كان هذا من حماسه لانتصارات
العرب، وإلا صناعة جيل من طلاّب يبنون الحضارة
كان همّه كيف ينهي منهجه، و(يحلل) الراتب، ويتقيّد بتعميم الوزارة!
كنت أظنّ أنّي ب أشوف ف نظرته: عثمان بن عفان في جيشه يغير
للأسف: شفت الوزير!
قالت: العب
قلت: يالله
قالت: ابغى السرعة أَزْوَدْ
قلت: أشوف النصر (كذب ابيض)، وأشوف أن الهزيمة (صدق، أسود)!
هو (لعبتك) عمري اللي به تسليتي
من حزن ماضيه، لا (كوميديا) الآتي
يا ليتني نمت، أو ليتك تعشيتي
أو انشغلنا بحاجه غير مأساتي
شفتي (يبنت اللذينا) كيف سوّيتي
(وش دخّل) اللعب في لعبك بونّاتي
في داخلي (ذات) مهزومه، ولو جيتي
ما كنتي أوّل ولا آخر من هزم ذاتي
مليت (الاعبك) يا نوره ومليتي
لاعشت نصرك ولاعشت انهزاماتي
تعالي نطفي (اللعبة)
ونطوي (السلك) من (توصيلة) الكهرب، بلا إحساس
ونرقد، وان سألنا الوقت قلنا له:
رقدنا زيّ كل الناس!