ايه افترقنا عن بعض غصبٍ وهذا مبتغاك
انتي وانا.. وحظوظنا عيّت علينا تلتقي
إيه ارحلي إيه إتركيني.. للشتات.. وللهلاك
مثلي تعود غيبتك حتى غدا واحد شقي..
إيه أنسي اللي ماعرف لو مرةٍ صاح بجداك
وافي معك وصله عطاء بالحُب دايم مغدقي
يوم الاماني لوّحت رسمت انا صورة غلاك
بروازها من عرق.. قلبٍ.. في تواصيفه نقي
وشلون أبنسى عمر طفلٍ في معيّتك إهتواك
عاشك على حلم الطفوله.. وردةٍ لو تورقي
إيه اورقي بي لعنبوا حي القصيد اللي عطاك
مشاعري شعرآ شعوره لا شعر بك.. ينتقي
آسمى عبارات الكلام اللي كتبته في لقاك
ب أول عمر من.. حبنا.. زاهي وكلّه في رُقي
مادام صرتي خايبه ياغايبه وش لي معاك
شمسك على حلم الغلا ماظن مره تشرقي..
روحي فمان جروحنا واللي كتبلك مانساك
الا نساك وكثرك.. يومك.. تزيدي وتعتقي
روحي فمان الذكريات الراسخه بأقصى خفاك
لا تنشدي أمانتك لا تنشدي.. وشهو بقي..
ايه ارحلي مادامها أكبر خطيه من خطاك
إيه أنسي اللي مابقى من ذكرياتي وأحرقي