ماغير صوتك لاندهني ولبيت
اجيك من شوقي مولع ومشفوح
ياغايبه لولا الغلا ماتعنيت
ولا جيت يمك ممتلي كلي جروح
مير الغلا يجبر خفوقي ليا جيت
غصبٍ علي اقول امرك ومسموح
لنك حبيب الامس واليوم حطيت
في وسط صدري لك مقامات وصروح
ياما وياما من بعادك تقاسيت
وياما شربت الهم والحزن والنوح
وياما على صبر الأماني تحليت
اضحك وخدي فوقه الدمع مسفوح
وش حيلتي ياصاحبي لو تناسيت
شخصٍ هويته اصبح اليوم مذبوح
في ملّتك قلبي وعنّه تخليت
ماظن يثمر لو جنى منه مربوح
افهم كلامي كانك الحين حسيت
الدرس واضح مايبي منّي شروح
ماعاد تفرق لو رحلت وتواريت
طعنتني واليوم انا منك مجروح
مع السلامه قلتها يومك اقفيت
وخليت قلبي من سبايبك مطروح
الله لنا في ضيقتي لوّي شكيت
والله يعين الي غدى كله جروح