لاحقيني بالنظر يانظرة الطرف اللعوبة
عيدي النظرة على ماقالوا النظرة سلاما
مزنةٍ ذعذع بها الغربي وجابتها هبوبه
حولها شوقي يحوم ولجلها شوفي تساما
اقبلت مثل الربيع انوار وازهار وعذوبة
عطرها واحساسها وانفاسها ورد وخزامى
كنّها بستان وردٍ ماحدٍ يعرف دروبه
غير قطرات المطر لاحوّلت فوقه تهامى
اشهد اني تبت من طرد الغرام وقلت توبة
لين شفت اللي جبينه ناهبٍ بدر التماما
ادعجٍ كن العطر يصنع من انفاسه لثوبه
يستبيح قلوب خلق الله ولايخشى الملاما
ان تبسّم ماتشوف الاّ الشفق لحظة غروبه
وان تكلم ودّي اغرق في ينابيع الكلاما
النسيم اليا تعداه استدار وعاد صوبه
يحضنه ب احساس ويضمّه بلهفة واهتماما
الله يبيحه على تعذيبي ويغفر ذنوبه
كثر ماتصدر عن حياضه معاليقي حياما
ان تغلّى ينخلق في خاطري مليون حوبة
وان تخّلى راحت ضلوعي من الفرقا حطاما