هذا اليوم مو يوم انتخابات
عقدة وراد بارينه يحلهه
مرشح واحد من الامة ميصير
بس يصير اذا سابق فضلهه
نص من الاله اتنزّل اعليه
يبشر الامة باوصافه اويگلهه
الخليفة يكون حامي حدود الاسلام
العقيدة يفدي روحه من اجلهه
الخليفة يكون مأوى جروح الايتام
خيمه اعليهه وبعطفه يظلهه
الخليفة يكون يشبه ذاك هارون
حتى الامة ما تتبع عجلهه
ومن بعد النذير لامته يصير
هوّ الهادي الهه وما يضلهه
هتف جبريل بلغ يا محمد
لأنك للامم سيد رسلهه
واگطع يا محمد حجج هالگوم
وحبال الفتن اگطع وَصِلهه
بلّغ يا محمد واجمع الناس
وتحت راية علي وحّد شَمِلهه
تبليغك يگر عين الديانات
ويْحقق أماني الرسل كلهه
صاح المصطفى واجتمعت حشود
القوافل حطّت اگباله رحِلهه
ألا يا أمتي من كنت مولاه
علي مولى الامم قاضي عدلهه
إني تارك فيكم الثقلين
كتاب الله وعلي أثقل ثقلهه
علي إسمه الذكر وحروفه آيات
علي للحكمه منبعها وأصلهه
علي الحيّر فكر وعقول هالناس
ابمعاجز بالبشر ما صح مثلهه
منو مثله انولد من بطن امّين
ابن بت أسد والكعبه طفلهه
منو مثله انولد من رَحْمِ الانوار
امه الولدته اتكوّن قبلهه
علي جدّ المناقب والكرامات
المناقب يرجع لحيدر نسلهه
علي شعلة كرامة بچف الايام
الزمن واجب يقدسهه ويجلهه
علي فكرة محمد عبر الازمان
الله اتكفّل بصورة نقلهه
هذا اللي خليفة يصير عالناس
گبل ما بيهه يتحكم نذلهه
هذا اللي الى الحق يهدي الگلوب
وغيره عن طريق الحق يزلهه
هذا المن يطب سوح الملمات
يعسعس ليلهه ويلمع نصلهه
هذا اللي اذا بيه حسّت الخيل
اعلى وجه الگاع ما تثبت رجلهه
علي هيبة الامة وفخر الاجيال
بيه عزّ العقيدة بغيره ذلهه
ولأن هذي حكومة حيدر يكون
مو بالحبر بالدم نبصم الهه