يابو معاذير باحت خافيات الكنين
ما كل عذرٍ يساق يعود بالفايده
ما يسقط العذر حقّ ولا يوفّي مدين
مطاول هموم فوق همومك الزايده
والله لو إنك خذيت العذر لك فرض عين
ما تآصل لكل ليله وأنت لي قايده
أنت تعرف تعتذر ، ما تعرف تسدّ دين
لين أصبح الوضع عندك حكمةٍ سايده
وأنا لك الله كم لي في حرى : (الله يعين)
ومن جمرة العذر كبدي كم لها جايده
يا مكثر اللايمين وما اكثر الناصحين
ولّا يمين الدعاوي ماهي بكايده
من يعرف أصل العرب ما يجهل الفرقتين
(أما عرب باقيه .. ولّا عرب بايده)
واللي يدور على جهينه عشان اليقين
قصده ماهوب اليقين .. دروبه النايده
يوم أنت ما جيتني حتى ب (خفّي حنين)
وتجمّل الصبر في عيني بلا فايده