بكى ذاك الرصيف المتعب الخاير
عبث يجمع فتات الحب والأشواق
شكى من وقته المنحوس والجاير
خلى من خطوة الغالين والعشاق
جرى من دمه المسفوح والثاير
نقاوة طيبته مع حبه الدفاق
رمى دلوا الأمل في ماءه الغائر
يكبله الوفاء والصدر به حراق
وش أقسي من لقى ما يسعد العاثر
سوى حرة فراق بداخل الأعماق
وأنا مثل الرصيف فوقتي الداير
تحيرني ليالي هالحبيب العاق
قطع حبل الوفى بأسلوبه الغادر
سهيرن وارتجي من ظلمته الإشراق
نسى ذيك السنين بطبعة الماكر
وذبلة وردة الماضي على الأوراق
تدثرت الصبر والوقت به ساير
يراقصني الحنين وطيفة البراق
أحاول انتفض من امسي لباكر
أناظر هالطريق الواسع الآفاق
ونبضي ينتشي يا رب وش صاير
يجاوبه الرصيف وذابت الأحداق
عسى غيث اللقا وبوقته الماطر
تهيم السنبلات وينحني هالساق
على ذاك الرصيف المنهك الحاير
بقايا ذكريات وكلمتين نفاق
وجمعتنا حكاية خلنا الناكر
أنا وذاك الرصيف ودمعتين فراق