الكوخ طين(ن)ثغْره الْعذْب وضّاح
...تلْعبْ عصافير الضّحىْ فيْ ثمانه
شمْس الأصيل اتْغازِلَهْ لين يرْتاح
...ويدْميْ صفوْ حِلْمهْ صَخَبْ زوبعانه
يصْفرْ هزيع الليل وِايْظنّه اشْباح
...ضوح وْدربْ منْسيْ يزيد اهْذيانه
تَعْصِفْ به الرّيح الْعتيّةْ ولاْ طاح
………حيث انّه ابْقىْ منْ عواصفْ زمانه
مشْقوق سَقْفهْ عَشْعَشَتْ فيه الارْواح
...كَمْ عام مَرّ وْماتزحْزحْ مكانه
رابيْ دجىْ ليلهْ علىْ ضوّ مصْباح
………قبْل الشّفقْ يرْسلْ صباحهْ عشانه
روْحهْ سنابلْ تمْتطيْ بارق(ن)لاح
………وريْحةْ عبقْ يشْمومه وْديدحانه
يسْكنْ مساماتهْ ندىْ ليل فلّاح
...هزيل كنّهْ مطْرق الخيزرانه
وجْههْ لِفَحه القيظ واظْلاله امْراح
...يرخيْ لأنْفاس القوايل عنانه
يقْطفْ قصيد(ن)نكْهِتَهْ طَعْم تْفاح
...لاذعْْذع الغرْبيْ علىْ زعْفرانه
ولاْ غازلهْ صوْت السواقي والالْواح
...هام وتخضب من بنانه بنانه
والْيا سِمَعْ غُصْن(ن)مِنَ الْوجد ميّاح
...خذاه لدروب(ن) بعيدهْ حنانه
ويقْفىْ على نسْمةْ أملْ ناي صدّاح
...في ظلّ صفْصافهْ..وِظلّ اقْحوانه
شايلْ أمانةْ منْجلهْ وين ما راح
…….يبْحثْ عن اجيال(ن)تشيْل الأمانه ..