لما شوفتك

لما شوفتك

قلت يا خساره يا مهجه

قلت آه

م اللى حبك قبل منى

وجيت وراه

ليه يا واد

ما شفتهاشى قبل منه؟!

كان زمانك

ويَّا مهجه

كان ولادها بَقُمْ

ولادكْ

والله يا خساره يا دنيا

ليه بتدى اللى زهدْ

واللى يتمنى ما طالش

ف يوم مُراده

جاىِّ متأخر تملِّى

حظي نفس الحظ

مش لاقى طريقى

مكتوبَه لى يا قلب مهجة

إنى أحبك

وإني أقاسى

ف غربتي وسط الليالى

عشت طول العمر أحلم

بيك، بغربل

حتى رمل الأرض

باحلم

إنى أشوفك يوم حقيقى

ولما شوفتك

قلتِ متأخر شويه

أصل قطر الحب عدَّى ع المحطه

خدنى رحت ف سكته

وعدت محطه

وف إيديَّ، منه عيل

عيلين

طب قول تلاته

جاى بتصحى المواجع

يا آخى سيبنى

الغرام مليت رموزه

والعيون السود بتاعتك

خليهالكْ

خلى حبك جِوَّا قلبك

متقولوشى

الصداقة ما بينا أنسب

الصديق دايماً تعوزه

آه يا مهجه

آه يا مهجه والعيون السود وليلهم

سهرونى

آه يا مهجه

شَعْرك العايق و خصرك

بهدلونى

والنبى لتخلى اسمى ع الشفايف

أصلى خايف

إنى أتسرسب لبَّره

ياما قالوا الشكوى مُرَّه

قلت هالك

آه يا مهجه لو بايدك

تقتلينى

ريحينى من عذابى ريحينى

آه يا حظي

لو قابلتك قبل منه

صدقينى

حطى خاتمه لقصتى

حطى و خدينى

راح آموت فيكِ يا إمَّا

تبعدى

راح تقتلينى!