لمَّا سألته: ياعمر إنتَ خايف؟
جاوب إجابة كنَّها بقلبي سيوف ..
جاوب وأحرج كل رذلٍ وهايف
أنا عمر ما أعرف الذل الخوف ..
اسمي يزلزل كل جيش وطوايف
أنا عمر ماني مزامير ودفوف ..
ما يستبيح الطفل إلَّا الضعايف
حد اليهودي من ورا جدار وكهوف ..
قصدك تواسي؟ .. والله هذي خفايف
وأختي بجنبي وكل حاخامٍ يشوف ..
دمْها على أصبع رجلها يا حسايف
وينك يا خالد وينك إنتَ يا بن عوف ..
أنا رضعت الموت بين القذايف
واستيئست نفسي من العالم عزوف ..
ما أنكسر شفني مثل باز نايف
ديني وأرضي دونها رقاب وحتوف ..
لله صبري .. رددتها الشفايف
تكفي وتغني عن دواوين وحروف ..
أدري نعيم القبر ماهو بزايف
وأدري جنان الخلد أنهار وقطوف ..
والله لأشكي يوم عرض الصحايف
ويجيبكم ربي طوابير وصفوف ..
يوم الوليف تفرِّ منه الولايف
يوم الجميع ينخِّ قدامه وقوف ..
لا شفت وجهي قول: يارب شايف
هذا البريء اللي ملا بوحه الجوف ..