رويت الفرحة من دمي
وبتمنى معايا تعبش
وكان نفسي في حضن أمي
عشان احكيلها وما خبيش
وأبوح وياها بالأسرار
فتفهمني
ولو حتى حكيت طرطايش
علشان احكيلها عن حبي
وعن قلبي ودقاته
وأحكي وعيني ما تخبيش
بحب الحب يا أمايه
وأخاف لا القلب ما يكفيش
وأخاف الفرحة ما تسعنيش
وتلمع عيني من الفرحة فتدعّي لي
يا رب يعيش يا رب يعيش
وتحضن قلب فتدفيه
ويعرق جسمي فتغطيه
ومن الجبهة
تنشف عرقي بإيديها
وتقرا الفاتحة كده رقية
فيهدي القلب وتهديه
ويعطش جوفي فبتسقيه
وتحضني كأن إيدها
بتلملم بقايا فيه
بحب الحب يا أُمايه
فخليكي وما تسبنيش
ودليني بقى احكيلي
أكمل حب ولا أستنى
ولا أعديش
يا سِري وستري وهوايا
قوليلي بس ما تخبيش
لقيت كده إيدها بتطبطب وتحضني
ونبرة صوتها كده ترعش وبتقولي...
يا قلب أمك
أنا جنبك ولا تخافيش
وخليه حب رباني ولا تنسيش
ساعتها ربي يحميكي
ويعزك ما يقلقكيش
ويفتحلك بيبان تانية
بالفرحة ما تنسدش
ولا تبكيش
وراعي ربنا يا بنتي
وإروي الحب بكرة يعيش
صحيت من نومي على صوتها
وملقتهاش..
اتاري ده حلم بلقاها
وما استناش
ياريت الحلم كان طول
معاها حاجات كتير تتعاش