غروٍ لعب بالهوى... توّه.
يكتب على قلبي افراحه.
قلت المطر... سابقه نوّه.
والناس ماهي بفلاحه.
لك وصل في خافقي روّه.
تجني بالاضلاع تفاحه.
لاتثني الغصن... بالقوّه.
وتذرف لك أورود فوّاحه.
بيت الجفا بخافقك طوّه.
وبيعه مادام الهنا ارباحه.
إقرب حنانٍ غدى مْتوّه.
لا تشهر الصد وسلاحه.
رفيق عمرك على سْلوّه.
درعك عن الوقت ورماحه.
يجبرني الود...! وأنوّه.
وانثر ورودٍ على الساحه.
من يضمن البحر بهدوّه.!
هادي ويزعل من ارياحه.
جيتك.! ألمّ العنا بجوّه.
ومايقلب السكر أملاحه.
الشوق...! ولّع بنا ضوّه.
والجوف نوره بمصباحه.
غرّدت صاب الحشا سِوّه.
من يسرق البلبل اجناحه.
صدري سما لو بقت لوّه.
متعلقه فيه... مرجاحه.
قلب الغلا بشوقنا شَوّه.
بالحب تنضح لك اقداحه.
والعاذل اللي بنا مفوّه.
ماهمني والله... انباحه.
اللي هَنَا لخافقك سَوّه.
سَرّ المشاعر على الراحه.