خرجت من سوالف الليل
حاملة فوق كتافها قط
وعلى كف محني نجوم مقطوفة
وميات خط وخط
وخاتم وخاتم وخناك وخناك
وعيون هي لبحور ولهداب الشط
والليل حامل بجنودو وخيولو
وهي تقول...
لي بغا شي ما يقولو يقولو
تهمهم بكلام
طالقة السوالف
مشركة اللثام
قالت لذوك النسوان فذاك الزمان
انا ليكوم نخالف
لي ما والف اليوم...
غدا دابا يوالف
خرجت من لحلامة حمامة
والغراب من ذاك الساعة غراب
راسو فلغمامة عمامة
ورجليه فاعماق التراب قراب
يخبي كل من هي حمامة
باسم العرف والدين والانساب
قالت عسالة...
ها سالفي طلقتو يهبل
ها دراعي يجري فيه لقمل
ها بطني لي بغا يكون لي كبل
ويجيب لي الذل
زمان قالت عسالة كلمة
قالتها جنون وهبال
زمان قال لغراب كلمة
قال ليها الله عليك الغزال
غابت عسالة
تبخرت مع لفجر
ولات عسالة
ما لقات حد تفكر
لقات تعسالت ولات موضة
كلشي تعسل
كان من لحديد فزمان عسالة لكبل
ولا من غير زمان عسالة من تقليد ومن ذل