تصبر قلب ولهان على بعدك وحبك ذاع

تصبّر قلب ولهانٍ على بعدك وحبك ذاع

يطوّل باله المشتاق وجرح الشوق ما ينقال

يجرّح صوته المشتاق ويدري في المحبه أوجاع

ولكن ما نسى لحظة بها نبضك سكن في الحال

يلوم الوقت لحظاته ويحسب كل لحظه تباع

ولا هان الغلا لحظه ولا غابت لك الآمال

يحنّ لصوتك الدافي ويحسك للقاء مناع

ولو إنك قريب اليوم بقلبه منك ألف افعال

وإذا ضاقت به الذكرى يئن ومن أنينه يراع

لانه يعشق وعشقه تمادى في الهوى لو طال

ورغم اللي حصل سامح بقُدره منك بالإقناع

يعاتب ظرفه القاسي ويرجع لك على كل حال

يخاف يعاتبك تزعل وهو في قربكم طماع

يجرّ النفس لهفة لك ولو يطرونك العذال

يحاول والوقت يمضي ويعلم بالوقت خداع

ولولا الشوق ما تصّبر ولاعاش الهوى رحّال

تعال وخلني أفهم.. هوانت وخافقي بصراع

يجوز أفوق واتعلم واعلم قلب بك مامال

ويا من ضاعت سنينك ياقلبي الواهم الملتاع

إذا ما كان لك شخص يحبك جد بك يختال

تعلّم تختصر حبّك فبعض الشوق ماله سناع

ولا تعطِي غلاك إن كان ما يستاهله رجال

ترى من باع ما يرجع ولا له في الهوى شفاع

ولا تهدي الوفاء للي وفاه لخاطرك إذلال

فما يرفع مقام القلب غير اللي لقدره واع

ومايدني مقام القلب إلا اللي لقدره إهمال

لا تعشق سوى قمّة ولا ترضى تكون القاع

ترى مو كل قلبٍ قال أحبّك يستحق وصال

ترفع عن امورٍ قد تذلك وإلا تلوي اذراع

تسامى مثل طيرٍ ما عرف غير السما منزال