باشعل سيجارة من انفاسك وابنفث كلام
يطير... لين يتجاوز سقف هذا المدى
يا مبعدة.. والشوارع ما تمل الزحام
مليت من خطوةٍ تمشي.. وضاعت سدى
تعالي استوطني صدري.. يطير الحمام
من وجنتك... لين يزرع فالغصون الندى
باطفّي الوقت وارجع بك معك ألف عام
نمشي بليا هُدى... ونضيع رُشد وهدى
باعلمك عن سواليف المطر والغمام
والورد والعشق والأصحاب.. قبل العدا
في يدينك يديني تغني عن المستهام
اللي قبل ينتهي عشقه.. عشقك وبدا
يشعل سيجارة من انفاسك.. وينفث كلام
ويطير لين يتجاوز سقف هذا المدى!