قوليلى ياللى المولى حارسك
إزاى هابقى فارس فوارسك
وعايزانى يامصر منك
عايزانى أبنك وأكونلك
من غير ماتبقى فاهمه حالك
وعايزانى ابقى فتى أحلامك
بآمارة إيه أكون.. وابقى فارسك
بأمارة إيه أأمن وأصدقك فى كلامك
قوليلى وأنا أحلملك بأحلامك
قوليلى ياللى المولى حارسك
إزاى هابقى فارس فوارسك
ومليون جن ماسك ولامسك
ليه رئيسك لما يمسك
مايبقاش عايز يسيب
بطانته حفنة محاسيب
للتقشف.. وللتعذيب
فى كل حته يجيب حرامى
وبالحصانة يفضل مآنسك
وبلدوزر فارمك وهارسك
لابس مليون قناع متلفع بالخداع
يكدب ويتمادى مايخافش من ربنا
يفرق مابيننا ويكدّب حكايةُ قربنا
قوليلى أعمل إيه لماهامسك
للغلابة المطحونين
للعطاشى البردانين
والقلوب المكسروين
اللى جاعوا ومتغربين
عطلانينك عوانسك
والى كسروا القمر ال مآنسك
واللى حابب يعدل لك عواكسك
واللى عاكس ومعكوس وعاكسك
مابقيتش عارفك ولا دارسك
وكدب فى كدب لحد مابقينا كدابين
اللى يتخفى فيهم ورا دقن ودين
واللى مستنى يشوفنا مُعدمين
واللى عايز يلحق له نايب ويبقى م الفايزين
أمتى أنا وأنت نبقى لكل دول جاهزين
أمتى تفتحى كفوفى وتئريلى الطالع
تئرى على روحك عدية ياسين تكشفى الطامع
بقى أنتى اللى كنتى تعرفى دبة النملة
جاية النهارده ومش عارفانا رايحين فين؟
وعايزانى يامصر منك
عايزانى أبنك وأكونلك
من غير ماتبقى فاهمه حالك
وعايزانى ابقى فتى أحلامك
بآمارة إيه أكون.. وابقى فارسك
بأمارة إيه أأمن وأصدق كلامك
قوليلى ياللى المولى حارسك
إزاى هابقى فارس فوارسك