لا بارت الهقوات واخطن الأقدام
والريح هبت عكس درب السفينة
لا نبكي الفايت ولا نرثي أحلام
والغيض لو هو كبر اجا كاظمينه
قدام يا بيض المقادير قدام
ياما تزين لكل نفس حزينه
أما بعد يا ذا الجلالة والإكرام
يامن لك الداعي بسط راحتينه
الهمني السلوان عن ماضي الأيام
عن ما جرى بين الضنين وضنينه
العام أقول الله يعديك يا عام
واليوم أقول العام ما شفت زينه
شمس الحقايق بددت غيم الأوهام
والانتظار انجب ليال الغبينه
يا بنت كان الشك في خاطرك حام
ما كل علم مصدره من جهينة
واليا رفعتي للوهم بيض الأعلام
حطي على قبر الرجا ياسمينه
تستغربين انه يحبك وهو شام؟
مفروض لو ما شام تستغربينه
حنا حشام وعندنا شيمة حشام
لو هي تحب نفوسنا ما نهينه
وأنا ليا عدو نزيهين الأقلام
لقيت لي مع أول الطرش عينه
شوفيه يبقى شامخ مثل الأهرام
يصد لو قلبه تجاهك وعينه
يا هاجري وإن بعتنا باردى الاقيام
عنكم نروح وودكم حافظينه
كان أنت ناسينا تصحيك الأيام
ترجع لنفسك لين تلقى يقينه
توسطو في وضعنا بعض الأقزام
وأنا ردي الجاه ديني ودينه
لو العرب سوو عنه بعض الأفلام
ما عنده إلا برد كفه وعينه