سلامتك يا نور عيني سلامات.. ليت المرض فيني وعنك اشيلة
عطني معاناتك وشيل المسرات.. والعافيه تفداك لو هي قليلة
رغم الغياب اللي بلا اي زلات.. ورغم ان قلبك صار غيري خليلة
الحب لك ما زال مستوطن الذات.. لانك تساوي كل ذكرى جميلة
ادري خسرتك لكن الحب ما مات.. ولا عرفت القى لقلبي بديلة
بسأل فؤادك وانت عطني اجابات.. ليه الثواني في غيابك ثقيلة
وليه أفكر فيك في كل الأوقات.. والعين تسهر والليالي طويلة
ليه المواجع والتعب والمعانات.. وليه السعادة في بعادك قتيلة