أنا سبة عذابي جادل في مشيته مختال
تثّنى في طريقي مثل غصنٍ موشكٍ قطفه
لأجله تحتضر أفكاري اللي أشغلنّ البال
وعقلي من هواجيسي قضى ماعاد به نصفه
شكيت الوجد من ليلٍ سهرته يوم همي طال
الا يالله تعطي كل خلٍ في الهوى شفه
توفّت فرحتي في وسط صدري أصبحت أطلال
وغابت بسمتي ماعاد تطري كود بالصدفه
على صدق المشاعر قلت أبا اضرب أروع الأمثال
أضحّي بالعمر من شان ترجح عنده الكفه
تغنّيت بحروف الحب مع لحن الزمن موّال
كتبت أشعار في مدح الحبيب وقلت في وصفه
جبينه غيمه إنشقت شعاع الشمس منها سال
على الخدّين هلّ النور وعانق جيده وكتفه
وشعرٍ ينثره من فوق متنه كنّه الشّلال
يذوب القلب إلا منّه تهلهل من على ردفه
وعينه عين وحشٍ قيّدوه بسلسلة وأغلال
وسهم الموت في سود اللّواحظ طعنته صلفه
أنافي غبة الوادي صدى صوتي يهز جبال
أنادي إرحم اللي من عذابك شايلٍ حتفه
با أدوّر لي على فيٍّ زهقت الحِلّ والترحال
تعبت من الظعون وشيلها ومن كثرة الوقفه