قول على الدنيا السلامه
لما الأسد يصبح نعامه
الكلّ عَمّال يشتمه
والكل صوّب سهامه
صوته اتخرس
جسمه اتحبس
كأنه عامل ملامه
مسجون في درب الشهامه
القرد عمّال يرفسه
يعم خليلك كرامه
خارج عرينك تسترك
واجعل لنفسك مكانه
قول على الدنيا السلامه
لما القذاره ترتفع
ونقول دي هيّ الشطاره
ونقول دي هيّ الطهاره
والواطي تسطع نجمته
بفلوسه يملك إماره
يِسْخر بريّس دولته
يصدح بصوت الحماره
والليل يطلّ بنجمته
وهو يشرب سيجاره
محشيه بانجو وسترته
مليانه خمرا وحقاره
قول على الدنيا السلامه
لما الجدل يملى الشجر
بدل الثمر
لما الدجل يصبح بطل
بين البشر
لما الإشاعة تنتشر
تحرق بلدنا وتنفجر
ونقول عليها الحضاره
قول على الدنيا السلامه
لما البنيّه ترتمي في حضن الولد
قاعدين في خيمه يضمهم علم البلد
ويقولوا ثوره على المبادئ بالجسد
يا ناس سيبونا بفكرنا
احنا المدد
احنا المناره نرتفع فوق الحسد
وانتم حيارى بطهركم
سقطت بلد
قول على الدنيا السلامه