الحزن في وجهي
مبين رسومه
بين العرب مدري وش الي يقولون
وسط المكان اللي طوالٍ حزومه
هليت شيٍ بالحشى كان مصيون
ياللي تلوم الشعر لا لا تلومه
الشعر دخانٍ على راس غليون
ليلٍ تدفن في ظلامه نجومه
كني بوسطه شخص مايملك عيون
اعيش واقع مختلط في حلومه
واحيان حلمٍ واحسبه شي مضمون
احيان اهل الحرف من غير سومه
واحيان يبرك وسطنا مثل طاعون
قمت اتذكر شي ضاعت رسومه
شيٍ يقال وشي بالجوف مكنون
قمت اسمع لصوتٍ تزاحم علومه
ايصحي الغافل ولو كان مجنون
ايقول رزقك يشبه لطلع دومه
لاتزرعه عجلان خلك على هون
واكبر نعيم اللي تهنى بنومه
اللي قبل لاينام مايحسب ديون
واكبر جحيم اللي خسر كل قومه
من سمعته عن بيت الاجواد ملعون
يومٍ تعلّ ويوم لازم تصومه
واللي صغير الناب يصبح بلا سنون
ومهما يطول العمر للموت يومه
لاجاك ماينفعك لو مال قارون
من عاش مظلومٍ ولو قيل بومه
خيرٍ من الظالم ولو كان فرعون
قمت اتخبط بالظلام وغيومه
متوكلٍ باللي خلق كل هالكون
اللي مع الله ماتراخت عزومه
الله من الظلّمات نجى لذا النون
خليل الحيسوني