بصدري شيخ
حالف مايطفّي
لناره يوم جاه الشعر لافي
صحيح ان القوافي ماتكفّي
ولكنّي بصيح بهالقوافي
بعد ماسال دمعي فوق كفّي
من الحسره وانا تحت اللحافي
انا حلمي عصافيرٍ ترفّي
طردت الحلم لين امسيت حافي
انا حزني عروسٍ لي تزفّي
وعندي اربع احزانٍ خلافي
تعالي مع طباينكي وصفّي
انا حتى مع الاحزان وافي
اعيش احيان في حالة تخفّي
عن العالم بسبة شي خافي
سيولٍ في خدودي ماتجفّي
من عيونٍ تدر الدمع صافي
سعادتنا على قارب مقفّي
وانا ماني بسباح احترافي
وقلبي قطع عروقه مشفّي
يبي ينزل يدورله مشافي
وجودي وجد رجالاً يصفّي
ديونه والمدين جاه لافي
كريمٍ بس ماله مايكفّي
لدين وضيف كيف يصير وافي
ذبح للضيف قبل انه يوفّي
لمال الدين والديان حافي
فقيرٍ عن يدين الناس عفّي
وشاف الوضع ثم ردد عوافي
خليل الحيسوني