بنت عز ما هي من بايعات الغرام
الدرابيل ما تلحق مشرافها
عقب ما مرت الجازي مرور الكرام
قانص الصيد لايرجي محاريفها
من حياها وعفتها وخوف الملام
ذايرٍ من خيال المهتوي طيفها
كن عليها من العفة قطيفة غمام
تلتعج من شعاع الشمس اطاريفها
ما تبين غلاها والوله والهيام
ينبت الشوق مسك في سراجيفها
أكرم المترفات اشحهم بالسلام
ينكسر طرفها ويزيد تشريفها
يا خضاب تخطى فيه سرب الحرام
جرة في الشفق محلى تواصيفها
يزعل الرمل همس أقدامها للرخام
والعصافير تسكر من سواليفها
لحن معزوفة موزارت صيَّح وقام
بعد م انهى كتابتها وتاليفها
نخبوية مجاني من خوال وعمام
كل شيخ يبا في كَرْته يضيفها
عرّضت مثل حلم عابر في منام
بعض الأيام يا محلى صوديفها
ما تحققتها بس اختصار الكلام
كن الإبداع راسمها على كيفها