الكام في كام بتساوي كام؟
أصلي بصراحة من زمان.. بحسب لها
محتاجة كام؟.. ومعايا كام؟.. يتبقى كااام..؟
واكمني تايه.. جيت لكم
ما انتم أكيد زيي.. وانا..
أنا مش غريب.. مانا منكم
الكمبيوتر عندنا
تاه واتلبخ في حسبتي
ما اقدرش يعرف حلها
وسلوكه ساحت كلها
والنور طفى منه.. ما قالشي تبقى كام؟؟
من فضلكم
لو تعرفوا حسبتها كام
يبقى جميل ما انساه لكم
الكاااام في كاااام... بتسااااوي كاااااام؟؟؟؟
يابن الحلال..
.. هشرحها لك
فيه ناس كتير من قبلنا
قالوا لنا
سلمها تسلم واتكل.. وانسى الحساب
عمك دياب.. شاف العذاب
من يوم ما جاله في باله آل يحسب لها
يتعب بكام.. يرتاح بكام؟
يفرح بكام.. يزعل بكام؟
وف يوم ما قال نفس السؤال
راحوا الديابة وجرجروه
لآ لأ يا عم
ابعد سؤالك عننا
محناش هنا
علم الحساب ما درسناهوش
ما بنعرفوش
دي حكاية عاوزة مننا ورقة وقلم
سلمها أسلم واتكل
الكام في كام
ما اعرفش يبقى ضربها بيساوي كام؟؟
يعني خلاص؟
مالناش خلاص؟
مش لاقي حد يدلني؟
يا سيدة
يامو العواجز والغلابة الشقيانين
ياخت الحسن.. ياخت الحسين
قالوا عليكي بتنصفي.. وبتعرفي
حل المسائل والمشاكل والحجاب ويا العمل
اييييييه العمل
أصل العيال.. وام العيال مستنيين
أرجع لهم آل ايه معايا مرتبي
هاتي الدفاتر واحسبي.. راح تتعبي
استحملي
بس الحساب هيكون كبير لو تكشفي عن حل لغز الحيرانين
فيه ناس كتير زيي هنا.. متلخبطين
الكام في كام.. بتساوي كام؟؟
يابن الحلال ما تتغاباش
ده مش سؤال
فيه حاجة يابني اسمها الكام في كام بتساوي كام؟؟
ما بتساويش
ما تشدنيش.. ما تودنيش وياك طريق ما تعرفوش
يا عم فوق.. واوعى تبص ف يوم لفوق
خايف عليك
الصقر فوق يخطف عنيك
هتروح لمين.. وتقول يا مين؟؟
دالسيدة ام العواجز زينا
صندوقها فاضي من سنين
خليك معانا واتكل.. وانسى الحساب
واضحك على ولادك وقول شدوا الحزام ع العضمتين
سيبهم يجوعوا.. ينشفوا
سيبهم يتوهوا يعرفوا طعم الضياع
عاشان يكونوا كلهم بكرة سباع
ما بيخافوش
اما انا.. وانت.. خلاص.. ماحناش وحوش
لكن رتوش
بنكمل الصورة الكبيرة الأبهة
افهم بقى
واسمع بقى
يا اما تمشي من هنا
يا اما أندهلك شاويش
الكام في كام..
ما اعرفش يابني ضريها بيساوي كام؟