ساخطة عليا
حيث حملت بيا
وحيث حلبت الغيم
يم ولداتني
ويم رباتني
لي ولداتني
رضعتني لكلام والحكمة
ولي رباتني
كبرت على وجهي الضيم
سخطتها
حيث لاحتني فالتوش
سخطاتني
وانا ولد لفشوش
ورضات على ولاد القلة والبوش
مسخوط حتى للتبورشة
نهار قلت مشاو الجنانات
وزالو لعشاش
وبلارج مشى ماجا
وبقات بلارجة عرجة
مسيخيط
وخا سكوتي وحادر راسي
مسيخيط
وساعة ساعة تندير فريشة
وساعة ساعة نقمش قميشة
وخا ما ربيت ظفران لمشاش
مي يا يما
شكون لمرضي
واش لي جرا ولا لي نشف الما
ولا لي قج لكلام
ويبس الحكما
ولاد الرضا تقلبو مساخيط
مي يا يما
لي فعنيه الجلالة
واش يزيدو لعما