ياليت سدر النوايا مايخون الكلام
لاصار للبوح في غصن الحشى عصفرة
نامت على ساحل احلامك جروحي ونام
صوت الغلا في دفا صمتك وذاب اكثره
بعيد يا موقد اعيان الرضا بالخصام
وارضك خلية من النوار والمرمرة
بعيد وارضك منابتها المدية صيام
وشجرْك لا فيةٍ تحته ولاش اثمرة
ما عمر كان الفراق المر برد وسلام
في بلقعٍ ما سقاه الغيث من سكره
منين ما تقطر احزاني تلين العظام
واحجز بصمتي واقص لوحدتي تذكرة
ان كان ودك تعلقها رموش النيام
علق وانا ما بقى لي شي لاجل اخسره
وان كان ودك تفض من الطريق الظلام
القلب فانوس وكفوف الوله مجمرة
تعال وابشر بتفاح السهر والغرام
وارم الزعل في نحر من يصنع الثرثرة
ان جيتني ممتلي ضيقة وحزن ملام
ازرع بصدري زعلك وخط في دفتره
وان جيت في كفك البيضا حمامة سلام
لك الفضا والرضا والعفو والمقدرة
والك القصايد بردها من سقوف الغمام
اضلاعي اوراق والخافق لها محبرة