تحيه طيبه ثم
نكلمكم عن اللي تم
جميل خالص احساسك
من يومك شايل لي الهم
دا كان طيب وكان حاسس
بان العمر مش بالكم
ممنونلك ومتشكر اوي خالص
بجد سلوك ولاد العم
وبنفارق ونصحي بالصدفه
علي هيصه وحبه ناس
محتمل يكونوا قريبين منا
وف الغالب ميشبهوناش
تغيب الصوره عن عينا
وسيناريو جديد اوي يتعاش
مسير الحي يتلاقي
تعبنا نصبر نفسنا وجايز
يموت الحي وعمره ماعاش
وجايز تلتقي ذكري
وجايز تلتقيك ذكري
غبي اللي خلد الفكره
كتب اسمه علي حيطه
غبي اللي حبها جدا
وضيع حبه بالغيبه
غبي اللي شد احلامه
ووقف يسمع العيطه
وكانوا كل شئ جيد
بحر وشط وجزيره
يغبوا بس بيطلوا
مبطلش الحنين ساعه
يجيب سيره
وحشني لما بيضموا
ولما كانوا بيوصوا
علي الجيره
وحشني صوت امي
وستي وخالي وماريا
معادش ف الوجود حاله
تكسر اي ضلوع فيا
راحوا وبقيت الوحده
وما للحزين ديه
شريد المعني قدامي
تتوه كل السكك وارجع
اعافر ضدي واقوم تاني
واكرر... ظني العمل يشفع
وبتدبر علي حالي
ومعادش حتي من يسمع
فبتبسم وانا مالل
فيصبح العموم مقبول
فعادي لما يميل مايل
مايمكن ميله للمايل
يقوم معدول...