تفضل تتسرسب منك وكأنك
معرفتش ولا حتي حاولت
متعلق علي صدر الكلمه
لو مالت تلاقيك مِلت
كوبايه الشاي والقلم الحبر
والورقه البيضه واخواتي
حلو لما تلاقي الصبر
بيتشكل ف بني ادمين
بافلي ونتاليا وفادي
وقصيده كان تايهه
تقريبا من تالته اعدادي
واصحابي الله واعلم
ان كانوا عايشين
واسئله من بدري
زي مثلا
ليه استاذ العربي
تحديدا مسؤل
عن حصص الدين؟
وحبيبتي اللي بعيده
ليه مقدرتش احضنها
لما اتلاقت العين والعين
كان كلي طموح
وحاجات بتروح مبترجعش
وكبرت وفضلت اودع
اه لو ايام ترجع
كنت اخدت تيتو بالحضن
كنت حكيتله اه لو يسمع
كنت مليت الدنيا كلام
كنت عملت حساب للسن
تفضل تتسرسب منك
ويفضل نفس شعور الضعف
اسوأ شئ هيصادفك
انك تبقي وحيد ف الصف
حتي الشِعر الباقي ف درجك
رافض قلمك... يكفر بيك
يعلن عصيانه لألمك
يلعن فيك
وتفضل انت ومفيش حوليك