بلادي.. يا بلادي.. يا بلادي والطريق منين
عجزت ألقى مكان يلم خطواتي ويقراني
لمين ابكي بعد رب البرية وأشتكيك لمين
بكيت وجيه ناس ولا بكى واحد على شاني
بلادي.. والطريق اللي حداني للسفر تنين
يبث النار من فم المسافة لين تصلاني
كذا ترضين؟ أصير إنسان يبكي.. ينكسر ويلين
ليا شفت السنين تمر واللحظة تعداني
منافي في منافي والفرج في صومعة بعدين
يفر المسبحة ويقبّل المحراب وحداني
بلادي.. ما عرفتيني؟ وأنا اللي جلت صدرك لين
مليت الخبت من دمع الرحيل وغيمة أحزاني
هنا في ربعك الخالي مكبّل من ثلاث سنين
هنا..والبرد يجلد عبرتي ويشل وجداني
من أيام "ايدمة" ل "الخن" لأول جرح في "يبرين"
وأنا اهذي بالطروق المبكيات وسرب قيفاني
بلادي كيف أخاف من الدما؟ وأخشى من السكين
مدام المشكلة بيني وبين تراب ودياني
ورب المصحف إني رحت اقسم خافقي نصفين
عشان أحيا بنصف وللحبايب نصفه الثاني
عشان اخرج من أفواه الظلال وكلمة "المسكين"
وأطمن خاطر أمي واستقيم بنظرة إخواني
بلادي.. يا بلادي.. يا بلادي.. والبقية وين
عساي ألقى مكان يشتت أحزاني ويقراني