البارحه والبرق يبرق في مراويح الغمام
عيني تخيله والصدور تفوح من تنهيتها
لبيه يا ذكر الحيا والغيث عقب الاحتدام
يشكي جفاف الارض والفرحه هذا توقيتها
اثر المطر يبعث مراسيل الموده والغرام
لأهل القلوب الي من الصبر اهتدى عفريتها
لا طاح سعر الصمت لا تشره على بعض الكلام
تمزع رموث الحبال الشهب لا مسيتها
يا اهل الوجيه السود ما عقب الغلا والاحترام
الا علومٍ تثبت الحجه ليا بديتها
حنا فعايلنا صدر وعلومنا قد المقام
ما نرخي الهامه ورى ناسٍ تمس بشيتها
والرفقه الي ما تقلطني على فرخ السنام
الله لا يرحم جدودي كان ما خليتها
مكينة السيزو ليا حدت ع روس العدام
قامت تدخن واحترق ماها وخالط زيتها
انا قصيدي مثل وصف النور جلاي الظلام
قريحتي نارٍ توهجر ما يطفي ليتها
امدح بها راس البطل واهجي بها راس الخمام
واقلط مع الشعار واعرف حيّها من ميتها
اليا بغيت انحت صخر واليا بغيت اشق خام
واكتب غزل في شيخة الترفات يخرب بيتها
يا عنق ضبيٍ ذيروها بالقفوش ام الحزام
لو انها ترعى وانا الرامي ف انا حنيتها
ما عاد باقي فالضمير الا التحيه والسلام
عن كلمةٍ عوجا ردعت النفس ما فكيتها