مسافرة مسافرة رتبت أنا أشيائي
بروح أدوّر لي أرضٍ غير مأهوله
أفكاري مبعثرة والمشي عشوائي
والدرب محظور والأحلام مشلوله
بروح أمارس جنوني وأقتل أعبائي
مابي خويٍ يخاويني بهالجوله
بحمل معايه صراحه وقول تلقائي
وقصة موادع وقطعة قلب منزوله
وشعري وجنوني وفلسفتي مع آرائي
بطلق لها عنانها وتقول ما تقوله
في رحلتي مستعده أفقد أعضائي
دام إني آمنت فيها صرت مسؤوله
مليت وأنا أنطعن بالظهر وأستائي
ما قلت مرةٍ هالطعن وش هو له؟