مَحْبُوبِي زَارْنِي أَسَعْدِي مَالْكِي رْضَا وْجَانِي
هْدَا لِيَا خَاتَمْ وْنَدْهِيتْ بْعَقْيَانُو
القسم الاول
جَادَتْ لَيَّامْ بَمْزَا رْ مَحْبُوبِي ضْيَاعْيَانِي
بَعْدْ أَيَّسْتْ مْجِيهْ وْأَيَّسْتْ مَنْ سَلْوَانُو
هْدَفْ وَلْقَانِي هبِيلْ مَنْ وَحْشُو نُومِي جْفَانِي
ضَدْ فَعْدَايْ وْضَدّْ فَلِّي كَانُوا صَدْقَانُو
جَانِي مَكْمُولْ لَبْهَا بَالصُّولاَ وْبْتِيهُوكْوَانِي
قَسَّمْ حَتَّى يْزُورْ وْبَرّْ غْزَالِي بَيْمَانُو
جَاوَهْدَالِي خْوِيتَمْ سْبَانِي كِيفْمَا مَالْكُو سْبَانِي
وَتْلَهِّيتْ يَا وَيْحِي وَتْخَادِيتْ بْجِيرَانُو
القسم الثاني
تْجَمْعَتْ خَدْمَانْ لَمْحَاسَنْ يَتْسَابْقُوعَلَى وْزَانِي
لَغْبِيبَة وَالتِّيتْ وْلَخْدِيَّدْ وَالجُّوهَرْ فْغْصَانُو
شْهَدْ لَعْنِيبْرِي لْتَاجْ لَرْيَامْ وْقَالْ فِي مْعَانِي
رَانِي عَسَّاسْ عَلَى خْوِيتَمْ لاَ يْهَجْمُو عَدْيَانُو
خْوِيتَمْ حَاطْ بَالنّْفَايَسْ يْقُولْ قْطَفْ لاَ تْوَانِي
كْحِيلِي وَيْمَارْتُو نُونِينْ هُمَا حَجْبَانُو
وَالأَنْف كَنّْ بَازصَايَلْ فَرَّادِي فْحَالُو صَلْمَانِي
حَاضِي لَرْوَاحْ لاَ تْطِيحْ وْلَعْقَلْ وْخَرْجَانُو
القسم الثالث
خْوِيتَمْ مَنْ دْرَارْ تْلاَلِي صْنِيعْ رَبّْنَا لْغَانِي
يَرْتِيوْ كَنْجُومْ مَنْ بْعِيدْ يْبَانُو
خْوِيتَمْ دْهِيتْ عَنُّو وَشْنُويَا تْرَى لِّي دْهَانِي
أَسِيلْ لْخَدّْ أَوْ لَحْظِينْ تَحْتْ لْغُرَّة زَانُو
وَالسَّالَفْ سْبِيبْ وَلاَّ سْقِيلْ حْكِيتُو يَا عَشْرَانِي
طَجّْ مَنْ مْحَاسَنْ مَايْلُو حَدّْ مَنْ عَشْرَانُو
وَتْفَافَحْ كَتْقُولْْ أَسَعْدْ مَنْ جَا لَجْنَانِي جْنَانِي
هَذَا تَفَّاحْ يَاوْ رُمَّانْ نْضَجْ قْبَل أَوَانُو
القسم الرابع
نْطَقْ لْجِيدْ بْالَفْصَاحَة يَا هْنَاكْ وَانْتَ لْهَانِي
شْكُونْ يَخْسَرْ لَخْوِيتَمْ وَيْعَجْبُو خَسْرَانُو
مَنْ قَدَّامُو لْمَرْجَانْ وْمَشْمُومْ لْوَرْدْ لْقَانِي
أَنْدَلْسِي مَنْ حْلاَوَةْ نَطْقُو كْبَرْ وَعْلاَ شَانُو
مْثِيلْ الشَّهْدْ فْلَحْلاَوَة مَنْ مْصَالُو رَانِي نْعَانِي
كِيفْ جْرَالِي سْهِيتْ وَتْخَادِيتْ فْجِيرَانُوِ
سُبْحَانْ اللهْ قُلْتْ لَلْجِيدْ مَلِّي الْخَدّْ لِيلُو خْدَانِي
وَصْدَرْالْمَرْمَرشْتْهِيتْ وْجْنِيتْ مَنْ رُمَّانُو
أَنَا الْمُولُوعْ بْلَمْحَاسَنْ وَالشِّيطَانْ مَا غْوَانِي
نَعْمَلْ لَحْرَامْ وْ الّْذِي نْهَانِي رَبِّي فْقُرْآنُو
وَاسْمِي مَوْضُوحْ فِي اخْتَامْ قَوْلِي مْعَ اوْزَانِي
فِيلاَلي يَطْلَبْ لَكْرِيمْ يَغْفَرْ لُو كُلْ عَصْيَانُو